2011月8月8日
北海道中央巴士 - 積丹線21号 [ 小樽駅前 9:00 ...... 島武意海岸入口 10:49 ] 1520円
今日全程巴士遊 [ 積丹半島 ], 終於唔駛坐火車, 依照有限的巴士時間班次, 今早八點幾走到 [ 小樽駅前 ] 的巴士駅, 買車票預早排定隊等上車 ...
我哋第一程巴士由 [ 小樽駅前 ] 出發, 先去第一個景點 [ 島武意海岸 ], 除咗可以預先係自動售票機購票外, 亦可等到落車時於巴士內直接繳款 ~
我見有時間剩, 所以去咗自動售票機直接按 1520 円車票 X 5, 免得落車時比錢咁煩 ~
該車乘客半滿, 約十多廿人上車, 巴士亦好準時開出, 車程約一小時四十九分鐘, 真係有排坐, 見累的團友, 可以坐住巴士睏過夠 ~
注意注意 : 上車時不用繳付車票或車費, 待下車時才一起放進繳款箱.
全程巴士初段, 因為無乜風景可言, 所以大家都係睏完又醒, 醒完又再睏, 直至駛到後半段, 終於見到 [ 積丹 ] 藍海, 人都醒晒, 沿路風景都變得吸引, 心情開始興奮起來, 巴士準時到達今日的第一個目的地 [ 島武意海岸入口 ], 放低五張車票, 馬上下車 ~
該駅除咗我們一行五人下車外, 亦見有一位日本人跟我們一同下車, 大家應該都係向着同一目的地進發 ~
離開巴士駅, 遠遠已望到 [ 島武意海岸 ] 方向的指示牌, 跟日本人一樣, 向着那邊走 ~
今日天氣相當好, 最高氣溫有成 30 度, 又係陽光普照, 烈日當空, 太陽高掛, 見到這樣的天氣, 真係又愛又恨, 簡直熱到都想暈 ~ 唉 ......
走到這裡, 可以選擇行樓梯或斜路上山, 看環境地形, 今次我哋揀咗樓梯, 感覺好似路段較短, 但大家已有心理準備, 又來開始挑戰自己, 又是一場苦戰 ~
見到一條行極都唔完的樓梯, 面上及身上的汗又不停咁流, 條氣就一路行一路不斷咁喘, 唯有通知眾團友再放慢腳步, 以免中暑 ~
幾經艱苦, 花咗十分鐘由巴士駅走到 [ 島武意海岸 ] 入口, 終鬆一口氣, 影過相, 順過氣, 又繼續行程 ~
通過這條黑到伸手不見五指的時光隧道, 便到達剛剛用完大量汗水及氣力換取返來的 [ 日本之渚百選 ] 之 [ 島武意海岸 ] 啦~
行到隧道中段, 四周變得冰凉透心, 馬上將之前熱到火滖的身體速速降溫, 真係唔願離開這條 [ 冷河 ] , 繼續摸黑一路順着走, 開始見有曙光, 跟着光源走離隧道 ~
一踏出隧道, 眼前即出現一幅靚到跟明信片一摸一樣的迷人風景, 點解個海可以咁藍, 海水可以咁清, 大自然的力量真係利害 ~
可以影到一張咁靚嘅 [ 積丹岬 ], 呢個旅程真係不枉此行 ~
再走高少少望向海, 找不到盡頭的海岸線, 給人感覺很舒服, 在此剎了不少記憶咭 ~
再 zoom 近海面, 海水確實清澈見底, 亦見有人在海面暢泳, 好似有點大剎風景 ~
走到另一邊看看, 都是海連天的構圖, 少見這樣的藍天藍海, 真係要望多幾眼才肯離開 ~
係呢處差不逗留咗四十五分鐘, 打算預鬆少少時間, 慢慢咁行返巴士駅, 唔駛到時到候又趕頭趕命 ~
順帶提提, 若想貪其方便, 又想食到一餐地道的積丹海膽料理, 位於 [ 島武意海岸 ] 入口旁的 [ 鱗晃 ], 是一個不錯的選擇, 這裡更是當地旅行團必到的預用餐廳, 除咗海膽料理外, 同時亦提供多種海鮮料理, 必一有款啱你口味 ~
因為我哋一早心有所屬, 所以情願花時間花車費, 即使捱肚餓, 都要前往另一間心儀的餐廳, 品嚐一頓期待已久的超級無敵 [ 海膽丼 ], 隨即匆匆離開 ~
 |
明謝布甸團友相片提供 |
返到巴士駅, 距離下班發車時間尚餘十多分鐘, 怕巴士突然出現, 唔敢亂走, 只好坐在一旁無所事事, 其間又重遇那位日本人, 估計他下個景點也跟我們一樣 ~
一直等, 一直等, 五分鐘過去, 十分鐘過去, 還未見巴士出現, 不知巴士是否已經走了, 開始有點擔心 ! 還好那日本人跟我們一起等候, 所以還有希望 ~
真係無諗過日本巴士可以遲成十二分鐘才到達, 見到巴士來臨, 大家馬上提起精神, 上到巴士拿過車票, 再過多三十分鐘, 便到達今日最終景點 [ 神威岬 ] ~
北海道中央巴士- 高速しゃこたん号 [ 島武意海岸入口 11:55 ( 12:07 ) ...... 神威岬 12:24 ( 12:36 ) ] 500円
今程巴士我哋改坐另一班由札幌直接開出的 [ 高速しゃこたん号 ], 由於巴士遲來, 所以順應延遲十多分鐘才到達下個目的地 ~
[ 前往交通]
由小樽出發, 於JR 小樽駅前的巴士駅, 於5号乘車處, 乘搭 [ 21 号積丹線 ] 或 [ 高速しゃこたん号線 ] 向 [ 島武意海岸入口 ] 及 [ 神威岬 ] 下車即達.
北海道中央バス株式会社 :
一般市內路線巴士 : [ 21号積丹線 ] 及 [ 高速しゃこたん号 ]
http://www.chuo-bus.co.jp/city_route/course/otaru/index.php ( 小樽⇔余市⇔美国･積丹余別方面 )
其他 :
都市間高速巴士 : http://www.chuo-bus.co.jp/highway/
小樽駅前巴士位置：5 号乘車處
北海道中央巴士時間表 : [ 21号積丹線 ] 及 [ 高速しゃこたん号 ]
http://www.chuo-bus.co.jp/city_route/course/common/images/pdf/otaru_08.pdf
高速しゃこたん号 :
料金表 : 各駅與各駅之間所需費用 [ 21号積丹線 ] 及 [ 高速しゃこたん号 ]
NEW ! http://ekibus.city.sapporo.jp/
沒有留言:
發佈留言